今個星期嘅主角就一定係新型號PS2內置HDD2合1主機，相信市價約$2,500-$2,600先有交易，未買機嘅玩家可以諗諗。提提大家，如果想玩Online買個PS2HDD，暫時只對應日本版主機，買時要Check清楚自己部機。本星期遊戲亦以網絡對應遊戲為主，好似《信長之野望online》同《全民高爾夫球》等亦會登場，大約賣$400左右。
BANDAI自從宣布WS停產之後，坊間好多舖頭都急急清埋貨尾，費事蝕大本，邊會諗到突然宣布出隻《聖鬥士星矢》撐場，搞到近排好多客仔都周圍搵機，而WS隻《聖鬥士星矢》故事則完全移植紅白機，7月31日發售。GBA嘅《超級機械人大戰D》同WS《超級機械人大戰》亦會有行貨。
上次鐵人報錯料，食住電影大收旺場而大賣嘅遊戲《ENTERTHEMATRIX》，唯一有中文嘅XBOX版行貨重未到，據代理消息，會延至6月20日發售，等中文嘅玩家重要稍等。而《BruteForce》同《MidtownMadness》就延至7月尾，想玩嘅朋友又係要再等等，今個月大作亦有CAPCOM嘅《DINOCRISIS3》，XBOX機主唔使怕冇Game玩。
文：打機鐵人