陳文媛（BoBo）入行兩年多，所屬的Stareast（東魅）唱片公司三度地震，至近日高層黃達輝入主，已有八個月未出唱片的BoBo不止出碟有期，更獲公司力捧做東魅一姐，但她竟說：「唔好話一唔一姐，咁叫好肉酸。」
現年二十三歲的陳文媛，加入樂壇兩年半，但其公司東魅已經歷了三度人事變遷，BoBo日前在尖沙嘴接受訪問時，坦言以前對公司地震會覺得「好癲」，一時之間無法適應，但人始終會長大，現在的她已能以平常心面對。
BoBo說：「嗰時公司啲同事走晒，梗係會唔捨得，但我發覺自己喺圈中要學識長大、要獨立，唔好成日倚賴人，所以最近公司再有變動，我都習慣咗咯。」
上周高層黃達輝正式入主東魅，有報道指東魅未來會力谷BoBo與E-kids上位，李蘢怡（Tiffany）及EO2則暫停出碟。
對於被捧為東魅一姐，BoBo聞言即笑說：「唔好講一唔一姐，咁叫好肉酸，好驚呀！大家畀個新名我，我做唔好咁點算呀？做嘢就唔好分邊個第一、邊個第二。至於Tiffany嘅嘢我真係唔知，亦唔由我去講。」
BoBo榮升一姐，為打好根基，最近又隨老師學唱歌，希望出碟時能予人耳目一新的感覺，不過儘管她如何努力，外界最關注的還是她與陳冠希（Edison）的緋聞。
問BoBo可覺緋聞是事業上的負累？她說：「用負累呢個字好似好嚴重，當然點都會有啲影響，但我控制唔到。不過我哋唔會避忌，有招呼就照打，冇影響呀。」
採訪：朱芷瑩
攝影：陳志嵐
化妝：Kman
髮型：Calvin（KenQi）
場地：小熊國
