上個星期，得知5月份本地代理嘅汽車銷售紀錄，跟4月份大致相若，仍未見有多大起色；4月份整體汽車銷量為1,027部，而5月份亦只略升至1,244部，當中以歐洲貴價轎車有較明顯升幅，從中可見SARS疫潮，跟新訂嘅汽車首次登記稅稅制，對中、高層次嘅汽車買家影響較小。紀錄中，平治S-Class同E-Class銷情最暢旺，令整個5月錄得有307部嘅成績；至於日本車一哥嘅豐田仍見出眾，全月跟凌志共賣出218部新車，較4月嘅221部略跌3部而已，惟其中銷售主力，就只有落響Corolla、Camry及Picnic身上。相比起豐田及凌志響2月曾刷新嘅606部高銷量，委實令人對汽車業前景感到憂慮；另有行內人士估計，自新稅制及SARS疫潮過後，失業人士數字上升外，亦相信有一批新車主，會放棄汽車嘅續供，對繼後本地新車銷量，或會出現下調現象㖭！