日本女星廣末涼子，最近為咗力谷啱啱上映嘅電影《戀愛寫真》，特別推出寫真集《NewYorkRHAvenue2003》，重賣大包隨書附送一張六十分鐘長嘅DVD。雖然廣末嘅人氣已經大不如前，但睇佢喺寫真集同DVD入面，個樣同身材重keep得好好，仍然好鬼可愛同誘人！
廣末嘅新片《戀愛寫真》喺美國紐約取景，呢本寫真集亦唔例外。話晒廣末喺日本都係一個好有知名度嘅女星，所以喺紐約機場大堂現身嗰陣，都要搵頂帽笠住半個頭，唔想畀啲日本人認得出。
呢張DVD拍低咗好多寫真集冇得睇嘅正嘢，好似廣末喺紐約shopping嗰陣，佢喺時裝店入面肆無忌憚咁揀女人底褲，跟住重好抵死咁對住攝影機試性感胸圍，相當搞鬼。
另外，廣末喺紐約周不時會攞架好專業嘅相機四圍影，原來佢除咗最愛影BB照片之外，連狗仔嘅patpat都唔放過，最後重要同隻狗仔咀番一啖㖭！