轉玩地下情
馮仁昭四圍超：Miki、天佑大浪灣戲水

組合Shine嘅徐天佑同Cookies嘅Miki一直被傳拍拖，點知早排突然傳佢哋分手，連日前Cookies嘅Kary喺卡拉OK慶祝生日，天佑都畀面賀佢，但Miki就冇影，於是就俾人話佢避開天佑而唔出席。
不過馮仁昭聽聞天佑同Miki搞咁多嘢，其實係想人以為佢哋真係分咗手，等佢哋可以轉玩地下情。上個禮拜馮仁昭個朋友去大浪灣游水，就見到佢哋一齊曬太陽，當日除咗佢哋兩個外，陳驊同天佑嘅助手都在場。Miki着住三點式曬太陽，都幾養眼。

陳驊邊行邊撥髮
天佑見到馮仁昭個朋友，都好有禮貌咁走過嚟打招呼，之後就同陳驊攞住滑浪板去游水，唔敢再留喺Miki身邊，後來佢哋重急急腳離開沙灘㖭！
其實佢哋曬太陽都唔算奇，至驚訝嗰幕係馮仁昭個朋友突然見到陳驊着住件冇扣鈕嘅長袖白恤衫晒胸肌，重一邊行，一邊迎風撥弄佢濕𣲷𣲷嘅頭髮，乜𠵱家重有人玩呢隻feel咩？

安雅收數一肚氣
安雅日前以一身性感打扮出席台灣電視遊戲宣傳，提到半年前嘅車禍，安雅真係一肚氣。由於面部受傷，安雅已經被迫將工作取消或者延期，荷包當然會大出血，於是要求肇事司機賠償，重畀佢分二十期清還，對方亦好爽快答應，但係個司機遲遲都未還清，重威脅安雅要搵吳宗憲解決呢件事，安雅當然唔會咁易放棄，重話如果十六號唔還錢就喺法庭見！

容祖兒險滯留內地
梁漢文同容祖兒（Joey）噚日分別去港台錄抗炎歌，Joey話前日喺廣州做完嘢經皇崗過關返香港時，先發覺將回鄉卡漏咗喺酒店，要搵人返去攞，結果足足等咗兩個鐘。近日熱門話題就講緊霆鋒搭上梅艷芳，Joey就唔信，重話喺霆鋒世界入面有好多朋友。至於梁漢文就話啲報道好荒謬同離譜，唔好破壞大家嘅友情同師徒感情。

華仔黎明下周鬥嘴
黎明同劉德華稍後會合拍電影《無間道Ⅲ之終極無間》，套戲年底先有得睇，但佢哋喺音樂上合作就下個星期五有得睇。黎明同華仔會喺紅館舉行嘅《凝聚每分感謝大會》度首次合唱，之前有人話佢哋唱華仔首《中國人》，但馮仁昭之前同黎明唱片公司高層王凱文傾過偈，佢話其實兩大天王會合唱前輩嘅歌，𠵱家重揀緊歌。

周杰倫出肖像汽水
百事嚟緊會以旗下代言人F4、周杰倫同郭富城等人嘅肖像推出特別版汽水，為令到百事嘅擁躉有機會同巨星會面，原定打算喺八月起由不同嘅百事代言人走訪各地，舉行巡迴見面會，但喺沙士持續威脅下，將會改喺十一月舉行，而見面會就會改以一次過全國性嘅形式舉行，活動名額就只得一千個。