冷門股嘉域集團（186）近期股價雖然有異動，但成交一直唔大，噚日突然出現成1300萬股大手成交上板。經紀黃話，一來有間歐資行推介；二來係歐資行推介之餘，順便幫芬佬要埋貨。由於有金手指要貨，經紀黃認為嘉域短期必然有異動。
嘉域噚日微升1%，收9.95元，成交股數1438萬股，其中有1300萬股成交，係非自動對盤交易，睇嚟就係經紀所講芬佬要貨嘅交易。
經紀黃話，嘉域今次推介重點，係旗下電子音響產品，查實嘉域重有經營金融外滙同埋其行業，但芬佬呢期鍾情電子消費品，所以搵嚟做賣點。
嘉域去年純利3.78億元，兼派末期息11仙，現價往績PE10.58倍。家陣工業股炒到禾雀亂飛，小初都唔識講貴定唔貴。
另外，小初前日係咁易講兩句，話華基電腦（859）嘅年輕炒家可能已經散到貨，噚日立即急跌44.8%，收0.243元，嚇得小初眼都定埋。
慕容小初