傳媒愈嚟愈發達係好事，但係隨時會害死人，唔信？你睇吓英格蘭前鋒朗尼喺對斯洛伐克時踢到咁差就知道，不過我求大俠覺得唔關佢事，衰就衰在英國傳媒煲得佢太勁，搞到佢壓力暴增，結果愛佢變成害佢。
一個十七歲細路仔就要佢做國家隊英雄救星，真係想佢孭鑊咩？朗尼本身確係有質素，但係踢波嘅嘢唔係咁簡單，經驗十分重要，呢啲嘢係要浸番嚟。
好可惜英國傳媒煲到冇嘢煲，將朗尼推出嚟，之後習慣投傳媒大眾所好嘅領隊艾歷臣癲埋一份，重話朗尼係天才，同巴治奧及雷哥斯達有得揮……唉！你叫朗尼仔點承受呢？結果睇到佢成場波冇腳好波，愈踢愈𤷪，最後信心都冇埋，似足受咗傷嘅鄰家小孩，好陰功！英國嘅傳媒大佬，保你哋大，唔好再咁高調煲朗尼，否則掂都畀你哋煲壞。
西甲重有兩輪就煞科，皇蘇、皇馬同拉科邊隊奪標，打埋周日呢輪賽事會有啲眉目，但我求大俠收到料，ESPN同埋StarSports當日要直播美國高球公開賽，同加拿大站一級方程式賽車，西甲被迫讓路，球迷禮拜六、日都冇直播波睇，肯定嗌悶囉！
意大利贈芬蘭雙蛋，睇戰果似贏得輕鬆，實際上芬蘭踢得一啲都唔差。我求大俠覺得意軍並唔係贏咩查柏東尼「四二三一」戰陣，講到尾都係贏在好波之人托迪同埋迪比亞路嘅個人技術，射兩個靚波。我唔會因為意軍頻頻報捷而讚老查同埋個陣好掂，重要時間證明。
前晚北愛打和西班牙○比○，雖然前者已經連續十場冇波入，但對佢哋嚟講，能夠迫和西班牙，個感受都同贏波都差唔多！功臣當然要數門將泰萊，如果唔係雲達沙因傷要長唞，呢位富咸二號門將幾難有機會上陣保持狀態；加上富咸嘅成績……弱隊出鋼門呢個道理真係無錯！
我求大俠發現南美球隊比賽都好「激烈」，好似哥倫比亞嘅卡利阿美利加咁，八強次回合已經同河床打到出現六個紅牌，呢場作客小保加又有三個紅牌，不過喺完場前趕多個出場，小保加至入多球贏夠二比○，上盤客真係多謝晒，好過買英格蘭喇！
日本完成兩場麒麟盃賽事，合共只有一個入球。日前對巴拉圭，薛高就突然用咗三都主打左閘，佢解釋呢位巴西援將有速度同傳中能力，希望可以帶嚟新衝擊，成為「秘密武器」，得唔得？我求大俠要睇埋喺洲際國家盃先下定論；但日韓兩隊近期友賽戰績差，係球員世盃後無咗鮮明目標，同埋處改組期，睇怕短期內難有突破。