市場預期美股進一步攀升，港股噚日再突破9700，收9736，升74點，惟成交不足90億元。
港股升市中發出唔少鏗鏗聲，傳聞話有中資力炒鋼鐵股，原本股價不足1元嘅馬鋼（323）勁升12%，收1.12元，成交高達2.08億元，成為噚日魚缸第4大成交股份。此外，鞍鋼（347）亦升5.9%；重鋼（1053）升9.7%，連帶中國鋁業（2600）與江西銅（358）亦分別升5.7%及7.9%。
中海油（883）阿媽公布首5個月純利大升近90%，市場斷估個仔表現唔會太差，股價被炒高5.7%，收11.20元，成交2.2億元。黑客話藍籌股升咗唔少，輪都輪到中資股發威。其實炒乜嘢消息唔重要，有錢就有權炒，若要搵消息，大可用QDII就快出台呢個消息炒住先。
e莉莎話，工業股炒浪好似就快到尾聲，唔知順龍（361）趕唔趕得切批股呢？近期工業股批股後都有一番炒作，順龍似乎亦唔想執輸，大股東話因為手持74%股權，公眾持股量屬偏低，唔排除向有興趣投資者發行新股，以增加流通量。
華基電腦（859）噚日玩跳水，全日勁插44.8%，收報0.243元，成交達1096萬元。此股早前批股1600萬股，每股作價0.238元，集資380萬元。
華基配完股之後，股價一路推高，然後有消息話會請分析員北上睇廠，搞到好似就快有大動作或好消息公布咁款，今次真係呃晒。Cookie話，今次好似係炒家出貨而唔係斬倉，而且睇嚟已出得七七八八，噚日股價未試過跌破0.238元配售價，今次散貨都算散得有秩序。
阿虎