美股上升，但港股只跟咗半日，下午就掉頭回落，恒指收報9662，跌41點，成交90.76億元。電盈（008）噚日被狂質，跌破5元，收報4.95元，跌2.9%，成交達3.82億元。唔知係咪空軍已經補晒倉，之前收埋批貨嘅大戶忍唔住要出貨？
裕元工業（551）過去半年累積升幅達1倍，前日出現8000萬元沽空交易後，噚日見到大摩、高盛及瑞銀力沽，一度急挫逾6%，低見21.30元，收報21.80元，仍跌3.96%，成交達1.84億元。標普亦出報告話裕元已經到價，睇嚟大戶已出貨七七八八，裕元炒浪接近尾聲。同系的新灃（1223）亦挫4.57%至4.175元，成交1248萬元。裕元回吐，相信其他鞋股亦唔會好過，要小心港台（645）同新怡（1094）。
中銀香港（2388）透明度開始增加，借予周正毅之貸款不愁追唔番，而國內調查劉金寶事件，只局限於中銀上海分行，唔關中銀香港事。不過外資行對中銀香港仍然唔多信任，繼瑞銀之後，德意志亦將中銀香港投資評級調低，最慘重係標普將其評級展望降至負面，即係話會隨時調低信貸評級。不過，中銀香港嘅捧場客似乎未捨得離場，股價仍然企穩。
21世紀通（241）又傳出北京中信會向其注資，以換取控制性股權，股價急升23%，收0.365元。今次傳聞一出，21世紀通成交大增至逾千萬元，好似好有睇頭。不過傳聞話，佢將會成為中信北京的信息產業旗艦，就真係令阿虎半信半疑，因為連中信泰富（267）都無辦法參與國內信息產業項目，更遑論其他殼股呢？就算北京中信真係向21世紀通注資，相信都唔會係一啲好矚目而又相當敏感的信息產業。
阿虎