李蘢怡小時候是刁蠻女，經常與弟弟打架互踢，有次更一腳踢向弟弟要害，連媽媽勸交亦不聽。
李蘢怡（Tiffany）童年既百厭又刁蠻，與胞弟更猶如撈亂骨頭，最愛動手動腳，有次Tiffany更老實不客氣，起腳拆弟弟「祠堂」！Tiffany日前說：「細佬好鬼衰㗎，成日抓人哋塊面，搞搞吓我哋咪鬥踢囉，跟住我就一腳踢佢嘅重要部位，後尾阿媽返嚟，即刻開大會。阿媽話細佬唔好再抓家姐塊面，女仔要靚，家姐就唔好再踢細佬下面，好重要㗎，但佢講完我哋一樣照開拖。」
不過兩姊弟長大後沒絲毫隔膜，Tiffany還有個同母異父妹妹，她說：「我八歲時，爹哋媽咪分開咗，嗰時我同細佬都唔開心，但𠵱家同爹哋媽咪嘅關係仍然非常好，細妹好乖，我好錫佢㗎。」
兒時的Tiffany還是個電視精，她常趁嫲嫲入廚房煮飯時，就悄悄打開房門，從門縫裏偷看電視，而她最喜歡的卡通就是《伙頭智多星》。
Tiffany笑說：「我好鍾意撈電視汁，《伙頭智多星》套卡通講煮嘢食，睇見都好味，我有時都會扮味吉陽一煮嘢食，新年又扮吓煮湯圓，但次次都俾阿嫲趕出廚房。嫲嫲好精靈，我同細佬沖完涼出嚟跣親，佢重話抵死呀！」
採訪：朱芷瑩
