昨日讚李國寶夠快人快語，唔好以為左丁山擦鞋，有一位仁兄喺公開場合發言，罵有些人唱衰香港，必須應付。據賓架陳講，呢位仁兄其實私底下則有一套說詞！
總之私底下，有頭有面人士講嘢就直率好多。呢日馬主N到蘇浙會所食晚飯，碰到富婆甲。富婆甲十幾年前與老公移民澳洲，攞完護照之後，就聲音兩邊走，佢老公近年東山復出，到東莞設廠，做出口生意做得非常好，於是好少返澳洲，富婆甲亦非常醒目，知道老公北上設廠，甚為「危險」，於是亦頻頻返嚟，昅到實。
呢晚富婆甲對馬主N講：「我有好多廠家闊太都同我一樣處境，移民海外，亦愛香港。但大家經過沙士一役，對特區政府更冇信心，以後或者少啲時間返嚟住咯，一啲朋友更開始逐步清理財產，賣得嘅就賣，只留番一間屋畀自己住就算咯。」
富婆甲自己都有十間八間屋，作收租之用，一旦要賣清，佢個經紀就有生意做咯。富婆甲與朋友睇唔好香港未來，要賣樓，接棒者會係乜嘢人呢？「投資移民」入境者？對香港充滿希望之人？真係唔知。每逢財富轉移之時，有錢人就進行另一場賭博，誰勝誰負，好難講，譬如十年前接貨嘅，九七年出貨，就賺到笑，揸到𠵱家，得個桔。今天接富婆甲嘅貨，會唔會等到另一個「九七」黃金歲月呢？