內地女星章子怡，早排拍緊《英雄》嗰陣，原來接受咗德國著名雜誌《Spiegel》訪問，佢唔知食咗乜嘢火藥，搏命勁踩荷李活，唔止話啲演員懶散，重話嗰邊冇好食嘅中國菜，令到佢冇興趣喺荷李活發展。
章子怡以國語對嗰本雜誌話：「荷李活演員每天只是工作十二小時，周末可以放假休息，他們在片場有自己的旅行車和食物侍候。相反在中國，我們一天拍十八小時。我拍《英雄》的時候，給人吊起，吊得很不舒服，才可以停止！」
對荷李活頗有微言嘅章子怡又話：「我對荷李活發展興趣不大，因為他們經常要中國女人扮演妓女或者郵購新娘，況且那裏沒甚麼中國菜好吃！」不過睇佢喺康城影展咁風騷，又睇唔出佢咁唔滿意喺外國發展喎！
亞視買咗套林心如主演嘅電視劇《男才女貌》，男女主角嚟唔到香港做宣傳，噚日亞視惟有喺總台打電話畀林心如做電話訪問。問林心如有傳套劇係為佢度身訂做，佢話：「係啊！呢一套係女人電視劇。」監製係緋聞男友唐季禮，少不免會俾人有特別優待嘅感覺，林心如解釋：「佢對個個都好，同埋佢都係嚟現場幾次。唉，講咗咁多次唔好講啦！」
噚日有報道指無綫計劃終止與藝員所簽嘅長約制，令到旗下藝員要打散工，搞到無綫高層區大鈞要即刻出嚟澄清，佢話公司現時冇咁嘅計劃，重強調TVB係一個好僱主，唔會為咗慳強積金供款，而迫班藝員做散工，相信無綫班藝員聽到都可以暫時放心啦！
趙頌茹（阿Yu、左)噚日去香港體育學院拍《體育世界》，佢今次係向亞運金牌選手趙詠賢學習打壁球，但原來阿Yu係運動白癡。而阿Yu最近有份拍《無間道II》，扮後生版Sammi，佢個名叫Mary，阿Yu話：「我唔識飲酒，但係之前要拍一場醉酒戲，咁黃秋生就叫我真係飲，咁我飲咗兩支酒，點知個頭周圍撞，真係好真實。」
蕭正楠噚日喺淘大商場拍宣傳香港短片，講到前晚電影《六樓后座》一班演員接受商台節目訪問，盧巧音重大爆曾同謝霆鋒拍拖。蕭正楠雖然冇上節目，但佢話《六》劇導演、監製同演員一齊玩過遊戲「誠實與大膽」，不過佢哋發過誓唔可以將內容洩漏出去，如果唔係要自斷雙腳！
