大市在高位有壓力，噚日高開低收，恒指早段曾升過70點，但收市倒跌41點，成交90億元。恒指在9700水平整固，已進入第4日，噚日午後嘅跌勢由期指帶動，但尾段期指嘅沽壓又唔見得特別重，看來是大戶在故弄玄虛。筆者看好中期後市，恒指可向10500至11000區域推進，但短期係先升後回，之後再上；抑或係先回後升，呢一兩日應該會有答案。
噚日上升股（不計認股證）有340多隻，比下跌股多出近百隻。石化同鋼鐵股呈強，逆流而上，上海石化（338）同馬鋼（323）最突出，升幅有2%；至於近期升後整固的浙江玻璃（739），再度發力，高收1.37元，升4.5%。
鋼鐵業和石化業復甦，呢兩類股份今年已升咗唔少，但仍然買得過，雖然大行同基金已飲咗頭啖湯，但現價同佢哋心目中嘅獲利價，仍有好大段距離。上文提及嘅浙玻，亦係受惠行業復甦嘅股份，但同1年前比較，當時股價2.5元，𠵱家只得1.37元，重唔見咗45%，同石化和鋼鐵股錄得之年升幅約20%比較，遠遠落後。
浙玻係浙江省最大平板玻璃生產商之一，02年度（12月年結）獲利8634萬元人民幣，倒退59%，但今年行業由谷底回升，集團經營情況亦明顯有改善。今年首季，浙玻獲利3360萬元人民幣，比前同期大增2.1倍，主要是玻璃價格回升9%，以及新生產線全面投產，產量增加。
由於市場預計浮法平板玻璃的需求今年會有逾1成增長，產品價格升勢在下半年會持續，浙玻有信心毛利率亦可回升。估計03年度集團盈利1.45億元人民幣，每股盈利23.7港仙，預測PE5.8倍。浙玻近期走勢形成三角形，噚日破位而上，短線量度升幅目標1.6元，中線升破3個月的大圓底，可見1.8元。
逆流而上的股票中，德信科技（1228）亦可留意。公司近日在新加坡推介，基金反應唔錯，兩日行程加多1倍，做騷後股價有異動，看來基金開始上車。德信主要生產計數機、電話同防水表，今年嘅定單已接滿，公司要增建廠房應付需求，相信今年盈利可保持高增長。
郭兆誠