前日剛剛話完近期港股走勢無新意，好友操縱大局，但噚日大戶即刻搞搞新意思，美股周二晚尾市掃高，但恒指竟然先高後低，倒跌41點，收9662。
好友近期甚少如此放生淡友，唔通真係畀趙飛雲話中，因為期指有排未結算，好友頂得太辛苦要唞唞氣？不過，港股技術未有明顯轉壞，恒指仍守10日線9623之上收市，加上250日線下移至9606，要跌穿才出現較大調整，估計亦會止於20日線9400水平，如果今日恒指跌穿9600，可以考慮順勢炒一轉恒指Put輪9715。
趙飛雲倉內的偉易達（303）及海域（1220）逆市上升，偉易達初段衝上6元，其後跟隨大市回軟，但仍升0.10元，收5.90元。按技術形態，偉易達守穩5.90元之上收市，將上試250日線6.35元，仍維持5.70元作止賺位。
海域昨日大升近4.5%，收1.40元，有助10日線迅速轉跌為升，低位入貨者可伺機加注，短炒以1.36元作計數位。意科（943）及文傳（343）昨日停牌，復牌後睇定走勢再作決定。
港股「雙天」滙豐（005）及中移動（941）有些少腳軟迹象，噚日皆輕微跌穿10日線收市，唔知係大戶疏忽還是故意示人以弱，今日兩股若能反彈則暫時冇事，否則要提高警覺，雖然股仔走勢未必跟貼大市，但大市若展開調整，始終會有影響。
趙飛雲