羅馬「王子」托迪日前重申，只要羅馬會長辛斯履行擴軍承諾，佢就唔會離隊。佢重怒罵意大利傳媒成日曲解佢嘅說話，令到佢同辛斯面左左喎。我求大俠覺得，你愈勞氣，意大利傳媒就愈高興，中正人哋圈套。
事緣托迪早幾日的確發過晦氣，話唔排除將來會跟貝盧斯科尼（AC會長）搵食。結果意國傳媒就攞住呢句話大做文章，講到佢走硬咁滯，累到辛斯急急企出嚟澄清鎮定軍心。
喺球壇，吹水轉會傳聞無日無之，遊戲制度不嬲係咁玩，托迪身為球星應該一早習慣，一笑置之咪算囉，為咩激氣吖？聽講自佢喺世界盃俾意國傳媒抨擊後，雙方關係唔多好，𠵱家講到出口同人唔妥，你在明人在暗，將來蝕底嘅咪又係你自己。
講開鬧人，啱啱比格拉斯哥流浪棄用嘅「風之子」簡尼基亞日前鬧波士麥利殊係雙面人。佢話流浪攞三冠之前，麥利殊講明會留用佢，但事後就話係會方決定唔用，佢都無能為力喎。簡尼基亞用詛咒口脗睇死麥利殊冇前途，三十幾歲真係老馬有火。
英格蘭新貴朗尼話喺偶像鄧肯費格遜身上學唔少嘢。我求大俠覺得佢最似鄧肯嘅就係成日有過勇動作，真係好學唔學。另外，有體育心理學家話朗尼喺球場上表現出大智慧，可媲美世界棋王卡斯柏諾夫。讚得咁勁，因住畀呢位小朋友太大壓力喎。
我求大俠最近喺國內足球網站，睇到好多關於國際米蘭嘅消息，原來國米一早有個喺青島起足球學校嘅計劃，擺明要進軍大陸市場。其他歐洲班霸好似曼聯、皇家馬德里一早進軍大陸市場，相信嚟緊有更多球會咁做，增高球隊東來比賽嘅機會，到時球迷有眼福囉。
原定下月尾嚟香港嘅利物浦，東遊行程一拖再拖，搞到香港呢邊一鑊泡；足總原定今個星期一開始賣飛只好押後；另外一間發行紅軍信用卡嘅銀行，定好晒嘅宣傳活動亦拖住；至於收費台重搞鬼，未落實就已經賣晒廣告話送波飛，究竟搞邊科呢？
英國網球手漢文四次打入溫布頓男單四強，但從未贏過冠軍，佢噚日話係因為溫布頓賽會近年所種嘅草令球速較慢，唔係咁利佢呢類善打快地嘅攻擊型球手，佢重話舊年決賽由曉域治同阿根廷納賓迪安兩個底線球手對壘，就可以證明呢個論據。我求大俠知道漢文每年都承受好大壓力，但輸波點可以賴地硬㗎！