恒指喺9700上下浮沉，足足有5日，昨日再跌41點。但上升股份數目較下跌股份多咗2成，個市底唔弱，後市無大調整之虞。
有機會平平哋可以買啲恒指Call輪，博大市升番，對象有9749、9750同9809。如果想刺激啲，即係贏與輸幅度都勁爆，則揀隻重有兩星期就埋單嘅9663，恒指變動100點，9663分分鐘升跌20%。
油股穩好，中石化（386）收1.82元，升4仙，大概因為今日除息（人民幣6分），收息客入場。中石化3隻Call輪9379、9227、9692，隻隻都係負溢價，係因為正股有息派，今日過後，正股若然按照股息調整，則各輪變咗平水或略有溢價。若見正股回落些少，可以諗吓收集隻9379，8月到期，現價28仙，負溢價3.3%，槓桿率6.5倍。
中信泰富（267）賣晒上海6個基建項目，收番62億元，賺3億特殊利潤，市場受落，收15.10元，升25仙，大行紛紛出報告，話交易對中信有利。吼位買隻Call輪9646，明年3月到期，現價13.9仙，溢價10.4%，槓桿率10.9倍。華創（291）跌10仙，收6.60元，可以收集Call輪9270，9月夠鐘，現價4.9仙，溢價5.3%，槓桿率13.5倍。華創其他Call輪，冇隻諗得過。
章盛