繼德國平治車廠，於日前公布咗五月份銷售數據後，份屬同鄉嘅寶馬汽車，亦於日前公布有關成績，表現亦見平穩。
喺五月，寶馬合共售出94,410部新車(連Mini及電單車在內)，較2002年同期嘅93,990部微升0.4%；若以單一品牌計算，寶馬於五月只售出79,910部新車，較去年同期82,790部下跌3.5%，廠方相信有此成績出現，係與新款寶馬5系快將推出，而影響原有5系嘅銷路有關，其中五月份所售出嘅5系亦只有13,010部，與去年同期相比下跌百分比為12.7%。另外，新一代Mini仍然係寶馬旗下最受歡迎嘅車種，於五月份售出車輛數目多達14,500部，比2002年同期嘅11,200部上升高達29.4%，表現可謂十分出色。
若以地區計算，寶馬響德國本土、美國及中國地區嘅銷售汽車數量，都錄得分別係0.7%、2.9%及63.2%嘅升幅；而Mini亦以英國、德國、美國、意大利及日本等地，成為銷量最高嘅個別地區之一呢！