我羅拉成日都話，唔係至紅嘅日本女歌手，出碟前都要拍吓性感寫真集造勢，銷量真係比齋出碟好好多㗎！
不過呢句說話睇怕要改寫囉，原因係男性偶像都逃唔過靠性感寫真造勢嘅命運，組合DAPUMP嘅二十四歲主音ISSA，最近同時推出個人大碟《EXTENSION》同寫真集《7》，簡直一脫驚人，其中佢嗰個傳統日本男人布包T-back、差唔多露晒全身毛嘅造型，簡直嚇到我目瞪口呆，好堅呀！
恕我得罪講句，香港fans對ISSA嘅認識，只係限於上原多香子嘅ex-boyfriend，或者係柴崎幸嘅新honey，但我羅拉覺得佢可以獨當一面，只係差咗啲運氣。
可能ISSA都係咁諗，佢今次盡地一煲，寫真集入面七個造型都極盡誇張之能事，除咗布包T-back外，紅番rock友、駁紅髮扮七彩濱崎步以及筋肉美女等等，好明顯落足心思，比起唔少女星嘅齋水着寫真更有官能刺激！
不過話時話，DAPUMP入面最紅嘅ISSA，佢本寫真集已經咁堅，跟住落嚟都會出個人寫真集嘅其他成員，如果要再創高峯，唔通要全裸？