全維港景嘅頂層單位罕有，租金定必好貴，但𠵱家十零蚊一呎就租到。中原地產新九龍奧運站分區經理蔡日基話，大角嘴維港灣七座頂層複式，二千四百二十六呎，啱啱以全包方式租出，月租三萬二千蚊，呎租只係十三個二。
屋苑高層千二呎單位，全包月租每呎一般要成二十蚊，計落平咗三成半。
蔡日基講，呢個單位五房兩套房設計，業主係一家外國公司，原本用千一萬買嚟畀高級員工住，最近改為出租，叫價四萬幾，最後減到三萬二租出。聽講原因係單位面積大，租客難求，若租金太高，租客就會轉租其他屋苑。又因呢個租客係優質租客，所以業主肯收少啲。
個租客係知名醫生，剛賣出手上單位，轉租樓住，睇過其他地區租盤後，最終揀咗維港灣，傾咗幾日就搞掂。呢個客原來係中記熟客介紹嘅。
將軍澳中心又搞代理鬥快成交新遊戲。聽講，今次發展商準備四十萬蚊獎金送畀代理。點至攞到呢，就喺噚日起到下個月十號，最快促成指定宗數嘅代理，就會獨得嘞。
大行嘅中原地產，指定宗數喺六十間，中型行嘅利嘉閣同港置，就喺二十間。用一個月嘅時間計，即喺中原每日要做兩間，港置同利記就每日平均做一間就得嘞。
YOHOTown係新地未來十年喺元朗賣樓成敗嘅關鍵，呢點不難理解，但係佢哋今次進行嘅宣傳攻勢，卻好似唧牙膏咁，每日唧啲，初頭就覺得有意思啫，但做得太濫，或會有反效果，因為大眾睇到麻木。
好嘞，言歸正傳，噚日佢哋就話會用成三十億去起YOHOTown百幾萬呎商場，務求做一個國際大型購物中心，裏面有動有靜，分別叫YoYoZone同HoHoZone。另外，商場下面又有個幾十條線路嘅交通總滙。
第一期最快要05或06年先可啓用，揭幕當日定為YohoDay，每年呢日都會搞好多文化藝術同娛樂表演，慶祝商場嘅誕生。
講完商場，今日新地又話會喺YOHOTown放置一部全球最大嘅三星牌負離子電視。
非典型肺炎襲港初期，市場一片恐慌，有啲手緊嘅業主，被迫要平賣單位。但疫症漸退，近日便出現連環轉手獲利情況。
有個灣仔區業主，用五十萬賣咗單位，點知買家即時將單位沽出，執咗十幾萬；而接手嘅買家，又再喺短時間內賣出物業，都賺到幾萬蚊。聽講話個價重高個原業主最初嘅開價，真係歎一句無奈。
屯門豐景園最近一日錄得三宗租務成交，聽祥益地產海翠分行經理潘鈺恒講，原因係一線屋苑租盤已經消化咗唔少，租客轉向二線屋苑物色單位。
潘鈺恒話，有時都會有意想唔到嘅平盤，好似豐景園二座高層三室，五百五十七方呎，業主放租叫價全包月租三千二百蚊，呎租五個七，比起早幾日成咗嘅單位呎租六個幾，平差唔多一成。單位雖然裝修一般，但向西南，重附有小量家電。
原業主一直自住，最近搬出九龍住，將單位放租，交吉咗只係兩三個禮拜，但因為業主唔肯交低鎖匙畀代理。所以睇樓就要夾啱時間至得。
豐景園𠵱家有十六個租盤，除咗上述放盤外，其他呎租都要六蚊以上。
蘭西
電郵地址：
