小初日前提及宜進利（304）轉幕後炒家，年輕炒家離場後宜進利勁炒。但今日小初唔係講宜進利，而係講華基電腦（859），原來年輕炒家轉戰江湖，主理緊華基嘅股份。
華基幾日前，以先舊後新方式批股，配售1600萬股，每股0.238元，集資額只係濕濕碎的380.8萬元。華基批股後，股價日日係咁踢上去，小初本來都冇留意咁奀豬嘅股仔，但家陣小型工業股當旺，所以四圍八卦，得知係年輕炒家主理。以批股數量嚟睇，又確係非常符合佢一貫小注怡情嘅作風。
年輕炒家批貨每股作價0.238元計，華基噚日最高見過0.475元，收0.44元，升10%，成交金額859萬銀，睇嚟今次佢應該可以成功散貨，手風咁順，真係可喜可賀。
另外，由於工業股炒風持續，好多同類股仔都順便炒埋，好似建發國際（223）靜完一大輪後，近排又見鑊氣漸盛，成個棚搭晒出嚟，炒家似準備做嘢。
慕容小初