陳太的三個仔女，每逢開飯都是無汁不歡！如果餸菜冇汁，又或餸汁不夠分，就會投訴「點解冇汁㗎？」於是陳太索性學煮碗仔翅及龍脷粟米汁。結果，只需一味湯汁撈飯就搞掂一餐，仔女更爭住添飯！埋單亦不過$15，經濟得超乎想像！
記者：吳佩璇
攝影：楊錦文
陳太一家都是碗仔翅的擁躉，她本人亦由細食到大。到結婚以後，每次回娘家探望母親，都仍會幫襯小時候在屋邨商場食開的那檔碗仔翅。後來這檔碗仔翅執了笠，又碰巧在報章上看介紹此食譜的製法，便試着學做。結果大受歡迎，個個親友都話「正」過出街食。大仔嘉輝及二女嘉欣更超級愛上，人家作為小食的碗仔翅，他倆卻用來撈飯吃，不但比平時食多一碗飯，陳太還笑說：「嗰餐有碗仔翅，其他餸佢兩個就一啖都唔使食。我連餸都可以煮少三分一，淨係預番自己同老公嘅份量就得，變相慳了買餸錢。」
大仔及二女都可以碗仔翅撈飯就搞掂一餐，孻仔嘉俊亦不遑多讓，但他卻不愛吃肉，故對碗仔翅興趣不濃。於是粟米魚羹、冬瓜粒湯等適合撈飯吃的湯汁，都成了陳家的例牌菜。只要有近兩星期不煮粟米魚羹，孻仔必定扭計！只6歲的嘉俊還說：「我平時食大半碗飯，媽咪煮粟米魚撈飯，我就食到2大碗！」還說有汁撈飯，十分滿分畀足媽咪三萬分！
從報章上學懂煮碗仔翅後，陳太仍不斷改良食味：「報紙教用雲耳煮，但我試過之後覺得唔夠爽，冇乜口感，所以改用木耳。」除此，陳太話最初試做時，總覺得不夠味，後來做廚師的哥哥指點，加點蠔油，果然惹味百倍！而且從小食慣碗仔翅的陳太，發覺自己煮可放足料，價錢比街外食重便宜了一大截！
用咩料：
白背木耳半両、冬菇1両、粉絲50g、雞胸肉（或瘦肉）4-6両、馬蹄粉4湯匙
陳太細仔嘉俊不愛吃肉，所以粟米肉粒不合仔仔胃口；於是改用冇骨，細路鍾意，又方便煮的急凍龍脷柳。最初為求香口惹味，以炸來烹調龍脷柳。後來為免熱氣改用煎的方式。前前後後花了約半年時間，才調配出現在這個恰到好處的味道來。
用咩料：
急凍龍脷柳約300g、罐頭粟米茸1罐（418g）、蛋1隻
家住灣仔的陳太，平日行開灣仔道街巿。因為相對同區的駱克道街巿，價錢較便宜。魚和菜都好抵買，陳太話：「二十蚊都買到條十両重嘅游水魚，三、四蚊又買到斤幾嘅靚菜。而且選擇都幾多，都算樣樣齊。」
除灣仔道街巿外，陳太的娘家在華富邨。拍攝當天陳太還帶我們行華富邨的街巿：「呢個街巿都係菜平又多嘢買。一般時菜，十蚊可以買到兩、三斤！」