綠色怪物變形俠醫，最近遍布街頭巷尾的大小廣告牌，令人又諗起經典的布祿士變身迫爆衫場面，實在好鬼震撼。查實大街小巷，搞出咁嘅驚嚇場面又豈止變形俠醫，尤其夏天，全身上下爆衫而出嘅肥肉一街都係，最驚嚇嘅莫如低腰褲上的大「車胎」，以為胸前「迫爆」就叫性感的一樣嚇壞人。各位女士要注意了，要迫得恰到好處，才最有魅力。
記者：梁佩芬 攝影：楊錦文、黃子偉
Model：Cathy（Sunspot）
胸前迫爆，早就不是大胸女人的專利，多得市面上奇招百出的Pushup胸圍，令一眾大小女人都可以輕而易舉突圍而出。不過凡事就切忌過火，太大貪美感都會變成Cheap。就由33B、恰到好處的Cathy，為大家示範一下，「迫」得恰到好處的道理。
首先，Cathy着了無墊的運動型胸圍，再着上恤衫，她覺得：「感覺好似無戴咁！」真係咁舒服？但呢款Bra全無作大，只有少少承托力，有幾多斤両都一目了然。以Cathy適中的身材，迫爆效果欠奉，不過感覺就幾清純。
內餡：無墊Bra
運動型胸圍，舒服取勝，冇嘢搞。（$495 PrivateShop）
迫爆第一級
跟着就要試試迫爆效果，首先試着鋼線胸圍，Cathy第一個感覺係：「個胸高了點，好似豐滿咗，最鍾意上面的喱士花紋，好Soft，又有Summer感覺！」一眼就看出胸部提高了，本來貼身的恤衫，居然有少許爆鈕的效果，大動作少少就即刻現罩！想要這種偶爾一露，性感可愛的效果，就切記不要穿那些肉色老土罩！
內餡：薄墊鋼線Bra
提升胸部線條，防止下垂，加上有喱士設計，令你解開恤衫鈕露少少時更有美感。（$589PrivateShop）
迫爆第二級
以前就興水墊托大個胸，但水袋重到死，受歡迎程度大減，AirPat勝在輕身，又可以將胸部兩邊肌肉向內推。着咗上身嘅Cathy就話：「我第一次見到自己條乳溝！」咁重未夠爆炸性，只見Cathy一俯身，居然一粒鈕應聲爆開，AirPat原來可做到真正爆鈕效果！
內餡：空氣Bra
底部有兩個可除出來的空氣墊，提升力比一般鋼線Bra強。（$469PrivateShop）
迫爆第三級
Cathy一着個厚墊Bra即大叫：「好誇張呀！將兩邊肉推晒去中間，好大條溝，從未試過咁勁，有質感但唔係太靚！」佢一邊跑樓梯重一邊爆鈕，但個Bra墊托到個胸太高，沒有了邊跑邊起伏不定的美感，好似假啲喎！
內餡：厚墊Bra
除在杯位底部及兩邊加了墊，可以提升胸部效果外，交叉帶設計，令乳溝更加突出！（$250Triumph）
爆衫40年
以迫爆衫聞名世界的《變形俠醫》（TheHulk），是1962年由美國著名漫畫家StanLee及JackKirby共同創造，兩年後，易名為《TheIncredibleHulk》。故事講述科學家布祿士因幫助爸爸研究一個基因實驗，但中途發生爆炸，吸收了過量的伽瑪射線，失了憶，而且每當情緒激動時，就會立刻變大，成為一隻十五呎高、擁有超能力的巨大怪物。原來變形俠醫已經爆衫爆足四十年。
初期的漫畫，變形俠醫是灰色的，但經過多個不同主筆加以改造後，演變成今天的綠色怪物。這綠色怪物一直大受歡迎，相繼以動畫、電視劇及電腦遊戲的形式出現，6月19號，更首次登上大銀幕。
睇過測試效果，似乎都係爆與唔爆之間最有美感，再睇睇街坊意見，原來無論男女，都一樣咁欣賞迫爆效果，但程度就有差異。女性多選第一級，話健康得嚟有少少性感；而男人就較多人選第二級，最緊要有嘢睇咁話。至於第三級，就男女都唔多受落，所以話，迫爆最緊要講技巧。
PrivateShop
地址：尖沙嘴海港城2134店
電話：31262257
Triumph
地址：尖沙嘴加拿芬道33-35號地下35A
電話：23162996