由張衞健主演嘅三十集新劇《功夫足球》今日舉行開鏡禮，不過張衞健、黃一飛、李彩樺、杜汶澤同林曉峰早幾日就已經喺廣州開工。張衞健喺戲入面最擅長神腿功，媲美周星馳嘅大力金剛腿。而黃一飛同電影《少林足球》一樣，依然以鐵頭功做賣點，不過佢個光頭今次有啲螺旋紋，似乎功夫已達到爐火純青嘅境界。
杜汶澤就最叻「影子功」，動作快到行過你身邊都唔知。林曉峰嘅角色就有啲似《少》片嘅趙薇，原本佢負責煮飯，但學識太極功後，就加入球隊做龍門。而李彩樺就飾演好鍾意鄧麗君嘅女仔，重成日模仿偶像唱歌跳舞㖭！
另外，《功》劇監製蕭若元噚日接受新城訪問，話《功》劇一開始就超支二百萬，佢話：「本來諗住每個演員帶一個助手，點知每人四、五個，連黃一飛都有兩個，酒店房要訂多好多間。不過就冇答應過佢哋會住五星級，咁吳君如咪自己租酒店囉。」
張惠妹嘅最新國語大碟《勇敢》，將於呢個月二十七號推出。阿妹喺新專輯中除咗嘗試唱HipHop同爵士味道嘅歌外，亦會試新造型，以比堅尼配襯絲質外衣，引人遐想。
唱片公司重買咗好多套比堅尼畀阿妹，而阿妹亦將自己啲私伙衫全部貢獻出嚟影封面。
陳冠希同蔡卓妍（阿Sa）合作拍《千機變》，佢哋喺戲入面做情侶，重有錫面同親嘴鏡頭。講到拍親熱戲，佢哋拍得好自然，完全冇尷尬，可能因為阿Sa冇同陳冠希傳過緋聞，所以拍攝時唔使避忌。《千》片喺呢個月尾上映，所以近排宣傳谷得幾勁，唔知到時票房得唔得呢？英皇為呢部戲使咗唔少錢，如果票房唔掂都幾大鑊。
嚴淑明早排諗住去台灣做嘢，點知因為冇預備到健康證明，結果搞到臨時上唔到機。近日台灣入境方面唔使旅客再出示健康證明，所以嚴淑明噚日即刻飛去台灣，馮仁昭見佢喺長榮櫃位順利checkin，量完體溫就入閘。不過嚴淑明過到台灣後都要隔離十日，至可繼續工作。
麥浚龍（Juno）噚日去灣仔出席漫畫節記招，成為今年漫畫節形象大使，Juno話：「好開心，平時漫畫節都會搵啲紅人做宣傳大使，我出道一年，就有機會做。我會叫大會畀我入去掃貨先，我打算用晒我啲積蓄去買漫畫。」睇嚟Juno積蓄都唔少，佢唔係想買起個漫畫展呀？
