居住淘大花園E座、曾被隔離的曾先生說：「我一向都唔知邊日係父親節，囡囡得三歲更加唔識啦！」我提提他，六月第三個星期日就是，他卻笑道：「睇住囡囡愈嚟愈大個，我感覺日日都係父親節。」縱使失業再加上沙士打擊，曾先生仍然積極面對生活，他不期望三歲女兒會如何與他慶祝，相反當日逗逗這位可愛小寶貝開心玩一日，已是曾先生最大的父親節禮物。
記者：梁佩芬 攝影：陳盛臣
1:00pm
熟客幫襯好感動
曾先生在午飯時間問老婆：「不如去老闆度食飯囉？」口中的老闆，就是位於淘大隔籬，一條毫不起眼橫街內的水餃店老細溫先生。水餃店距離淘大五分鐘路程，曾家一到就坐在門口位，開揚通風，又方便與廚房內的老闆寒暄。五分鐘後，我奇怪問：「點解你哋唔點菜？」曾太卻笑：「我哋食乜老闆都知啦！」
曾生雖是熟客，但老闆都不知道他們住在淘大E座，直到當日在隔離營出嚟，電視影住穎霖，才知道這家熟客要隔離。雨過天青，曾在國內京川菜館學廚的溫老闆興奮說：「好在佢哋出營後幾日就嚟食飯，知佢哋無事都安心啲，如果見到識嘅人染病，個心都會翳住翳住！」
不是住附近，也不知小巷內有間蜚聲國際的上海舖，1999年水餃店被日本美食雜誌評為該年度十間最正店，文中大讚的担担麵、小籠包、上海粗炒及煎餃子，都是曾生一家最鍾意的美食。細閱剪報，開舖至今六年，食物從未加價。曾生慢嚼小籠包，說：「我做過食肆，一食就知係真功夫，小本生意，難得好手藝！」
2:15pm
離開上海食店，只是下午兩點幾，曾生行入德福商場，一上電梯，帶點欷歔，指着間酒樓：「我一年前就喺呢度返工，以前無咁靚，最近裝修過……幾新淨。」邊說邊走，沒有回頭。
女兒嚷着要行街，曾生與太太互望，心有靈犀，告訴我：「倒不如去德福嗰邊行吓商場，畀囡囡坐吓車仔，佢最鍾意！」曾生口中的「坐吓車仔」，指在美國冒險樂園門口嗰啲入錢會郁嘅「車仔」，穎霖一到門口，即鬆開爸爸，快步直奔往車仔那邊，跳上車，手扭軚盤，腳踏油門，一臉認真在駕駛着，雖然曾生唔會入錢，但他笑說：「佢就係咁，唔郁都玩得好開心！」我明白，快樂與錢，真是毫無關係！
3:00pm
穎霖的活力開始減退，是時候打道回府，途徑牛頭角下邨的雜貨舖，被門外的粉紅豬仔錢罌所吸引！爸爸看穿她心意，「係唔係鍾意粉紅色嗰個呀？」穎霖笑而不語，雙眼卻盯着不放。老細見狀，即說：「妹妹，五蚊一個，買個返屋企儲錢啦！」爸爸這時已取出五蚊，老細將粉紅小豬送到穎霖手上。這時候，老細才發現：「你咪係住淘大個妹妹？眼仔碌碌最易認！你哋無事嗎？」曾生曾太忙說：「我哋無事，有心！」
4:30pm
私人醒本日記簿
老闆袁太，喺淘大開文具舖二十年，「沙士」最勁嘅四月，都曾停業七日，就算開番舖，成個月都無生意。「嗰排日日返嚟都先用三個鐘頭清潔消毒，之後就等人到，但真係八號風球都無咁靜！雖然無人行，但都堅持要開舖，至少畀人知道你間舖重健在。」
但生意額一成都無，由原來一日四個夥計，變成每日兩個，一星期放三日假，袁太感慨說：「我都唔想！」開番舖初期，無生意之餘，原來連食都無得食：「四、五月，所有食肆都閂門，乜都無得食，日日都係咬杯麵，𠵱家索性帶飯返嚟食。」今次見到穎霖嚟幫襯當然開心，而且重送多本日記簿畀佢㖭！
不經不覺已經傍晚，臨走時，我問穎霖，你會送甚麼給爸爸做父親節禮物呢？她想也不想，就一啖錫落爸爸的面上，爸爸當然受落，囡囡使勁再錫多四、五下，爸爸一連收了五個吻，面額還有少許口水印！其實，我發現，曾家的父親節，收穫最豐富原來是三歲的穎霖！
麗斯（香港）有限公司
地址：淘大商場三期二樓F213-4
電話：27954095
過橋水餃店
地址：牛頭角道19號嘉和園36號地下
電話：27557238
經過沙士一役後，淘大居民變得團結起來，以前撞口撞面都唔慌會點頭打招呼，𠵱家至少都有傾有講，總算係有得着。