八方呢輪成日收到投訴，話啲公立醫院冇晒人性，病人家屬想見吓患病家人最後一面都好難，唔知當局搞乜鬼。
八方去請教一位公立醫院醫生，點知佢一開口就大罵楊永強呢班人，「你哋玩政治角力，就害死香港人！」搞個小湯山平房式嘅隔離醫院，講到今日重議而不決，一陣何兆煒同梁智鴻又話會快快起，一陣楊永強又話冇需要，然後醫管局又話要再諗吓，而楊永強又改口風，結果咪disable（打殘）全港公立醫院，令佢哋無法正常運作，連家人想探病、送終都唔得。
呢位老哥愈鬧愈㷫，話北京都有辦你睇啦，點解香港唔可以搵個度假營即刻改裝，送晒啲懷疑中招嘅老人家，唔使𠵱家間間醫院都死晒火。
其實八方都有親口問過楊局長，點解唔起間隔離醫院，佢好凝重咁話「冇用嘅」，咁重有乜好講。𠵱家個波踢咗去邊都冇人知，不過八方收到消息話醫管局已決定派人去小湯山取經。
其實地點最唔使憂，幾個工業邨包括將軍澳都丟空晒，地又已經平整好，有水電供應，使乜周圍搵地方。有人話，既然楊局長唔制，就不如一人一電郵向老董請願啦！特首辦電郵：[email protected]。
傳真︰2623-9278
電郵︰