區瑞強，人所共知是最充滿田園味的爸爸，他笑說，其實父親節也不會有重大慶祝，因為只要平日多些陪着小朋友，每天也是父親節。
「今個父親節無論係安排啲咩節目，目的都係同小朋友一齊，可能會帶佢哋到坪洲嘅市集逛逛，或者到海邊釣吓魚。如果係出海，主要任務係釣魚，一定要有收穫，但同小朋友去未必一定需要釣大魚，因為目的係同佢哋開開心心一齊，互相了解。有時候，掘蜆、掘螺都算係好好嘅收穫。」
入黑後，區瑞強不愛到酒樓或餐廳人多的食肆。
「鍾意燒嘢食，買一啲韓國燒烤嘅嘢食返屋企，一家人自己煮嚟食，因為父親節係溫馨日子，做啲咩都係想一家人有溫暖嘅感覺。如果到酒樓食飯，但小朋友就睇公仔書，自己同其他人傾偈，咁樣過父親節就最冇意思。」
區瑞強強調，度過一個父親節，最重要是過程，大家互相了解，就是一起去買本書，好過隆隆重重吃一頓飯。