經紀黃噚日好興奮，皆因3隻最愛鞋股裕元集團（551）、信星集團（1170）同埋新灃集團（1223），股價皆再創新高，佢雖然唔多捨得，但亦忍唔住沽出部份套現。
經紀黃話，3隻鞋股之中，賺得最多係投機味最重嘅新灃，噚日勁升17.45%，收4.375元，其實裕元表現亦一啲唔弱，大升10.74%，收22.70元，但睇嚟短期內已經到晒價。
基於芬佬對工業股意猶未盡，經紀黃諗住再下一城，吼另一隻老牌工業股金山工業（040），佢話隻股雖然升咗唔少，但下周四公布全年業績，如無意外應大幅好轉，加上有芬佬吼住，可以買少少玩吓。
金山去年12月公布02年中期業績，盈利3880萬元，幾乎等於01年全年盈利咁滯，除非下半年有重大意外，否則全年業績應該好掂。
金山成交一向唔多，芬佬想買貨唔容易，唔排除已有證券行拉紅線，幫金山搞批股都未定。
慕容小初