久違螢光幕的關禮傑又回到香港觀眾身邊，這位年輕父親已有兩個可愛的女兒，加上妻子共組溫馨一家。孻女還小，長女也才八歲，不過兩個女兒各有辦法逗傑仔歡心。
「第一個父親節感受最大，因為係自己親骨肉，雖然當時佢只有幾個月大，唔識講『父親節快樂』，但攬住佢嗰一刻係好有感覺。𠵱家細女已經識得講『父親節快樂』，不過佢其實唔明呢句說話嘅意思。」
在今個父親節，兩個女兒較傑仔更快樂，因為父親在香港可以陪她們。「早幾年成日返大陸拍戲，老婆喺學校放假時帶埋佢哋探班。大女讀K2，我啱啱喺上海拍戲，先生問小朋友爹哋媽咪做邊行，佢就喺幼稚園喊出嚟，因為平時唔喺佢哋身邊，𠵱家得閒就會陪佢哋返學。」
傑仔自言偏心大女多啲，不過湊細女返學時，聽到她喊住叫爹哋唔好走，就會心軟想帶她返屋企，這時幸得老師出馬才沒做逃學儍事。「有咗個女後我更加珍惜生命，更希望創一番事業。父親節當日希望一家人可以食餐飯，爭取時間共敘天倫嘛！」