港股噚日走勢又係熟口熟面，恒指跟隨美股周一跌勢，初段最多跌過108點，跟住又係反覆挾上，最後僅跌29點，收9703。
大戶揸重好倉，港股跌唔落的印象愈來愈深入民心。不過，現時距離期指結算重有13個交易日，好友要頂咁長時間確係唔容易。
港股短期關鍵要睇美股會否繼續造好，帶動港股上升。上周五美股高開低收，有短期見頂迹象，周一晚跌勢持續，如果昨夜繼續大幅下挫，好友可能要放棄250日線防線，退守9500-9400。
倉內偉易達（303）午市發力抽上，以全日高位5.80元收市。短期若能守在5.90之上整固，有力挑戰250日線6.35元。短炒可將止賺位推上5.70元。
海域（1220）昨日早市高見1.34元，其後在回落至1.32元買入5萬股，最後以全日高位1.34元收市。海域10日線將跌穿20日線，可能壓抑短期升勢，需要整固幾日，而時間上亦配合月尾海域化工分拆上市，可在10日線轉跌回升後加注。
此外大行老友亦叫留意文傳（343）及意科（943），據聞兩股合作組新公司，並引入美國大型晶片公司入股。近期文傳已借其他消息炒高，雖仍有上升空間，但比較之下，意科有追落後概念，意科昨日收0.29元，升5.5%。技術上，0.30元為近期頂部阻力，20日線0.28元則支持不俗。可在0.28-0.29元區域伺機吸納，以50日線（現處0.27元）作止蝕位。
趙飛雲