李國寶做銀行界代議士，真係冇得頂，夠膽講說話。呢位賓架李炮不虛發，一發炮，簡達恒就要企出嚟為金管局辯護，佢講嘅甚麼unusualbutnotunique（罕有啫，並非只此一單），亦惹人懷疑，如果三四日就批准和廣北出任中銀香港總裁，唔係「只此一件」嘅話，唔該簡達恒講一聲，其他相同例子係邊一個？涉及邊一間銀行？李國寶話自己都要等兩個星期，金管局先至做完審批工作噃！李國寶係邊個先？身家清白，家族顯赫，五代營商，公職歷史，叔伯兄弟出猛人，自己又係劍橋畢業，喺銀行界工作多年，金管局做乜事花兩個星期嚟審核佢？反而只用三四日就OK咗和廣北？唔通簡達恒一早知道和先生嘅六代家族史咩？
李國寶出聲，中環賓架齊聲叫好，猛話寶哥哥使得。唔同其他立法會議員，日日出席會議，開足會都冇句好嘢講。讚完李國寶之後，幾位賓架又驚明年選舉，有保皇黨?派會派人出嚟撼寶哥哥，逼啲本地銀行支持保皇派銀行家。所有外資銀行唔在講都會投寶哥哥一票㗎嘞，保皇派如果搵到人與寶哥哥對撼，其實慘敗嘅機會好大！
唔止眾賓架讚好，大把高官亦暗自慶幸，向寶哥哥喝采。因為佢哋唔敢出聲，有寶哥哥出頭，啲高官舒咗啖氣，亦畀到藉口佢哋去做番啲嘢！