大潭知名豪宅紅山半島噚日錄得一個分層同一間獨立屋成交，今個月累積成交有三宗，不過造價就唔係咁理想。其中分層單位造價創歷史新低，每呎四千二，比舊年十月同類單位低咗百分之八，重平過二十年樓齡嘅鰂魚涌太古城全海景單位。
呢個新低價紅山單位，面積二千一百四十三方呎，成交價九百萬元，原業主九七年以二千九百萬元買入，淨係帳面都勁蝕二千萬，貶值近七成。
不過，代理話，紅山分層重有一個低層大單位放緊，面積二千一百五十三方呎，叫價八百幾萬，呎價隨時跌穿四千蚊，重平過屋苑。
另一宗成交係A型三十一號屋，二千八百八十呎，成交價一千六百八十萬元，呎價五千八百三十三蚊。
中原趙鴻運話，太古城複式或者超高層全海景單位，呎價至少四千五，喺二月就做咗間海棠閣高層一千二百三十七呎單位，呎價四千八百九十一蚊。
恒基大角嘴港灣豪庭銷情報捷，噚日特別搞咗個「海上遊─洋紫荊」嘅遊船河活動慶祝，請咗「地產代理牙骹戰」勝出嘅美聯同港置一齊上船慶功，連埋傳媒同發展商職員，有二百人到場。
此行由灣仔出發，先駛往竹篙灣，參觀未來嘅旅遊點，香港迪士尼樂園，不過𠵱家淨係得個地盤。跟住由竹篙灣經過中環，直駛去西灣河，喺海上遙望恒基西灣河碼頭項目，等大家影番張靚相，講吓個盤。發展商計到盡，一程船就可以「一舉三得」。
雖然今次去竹篙灣無乜大發現，不過恒基張炳強（Donald）就相當雀躍，佢重話迪士尼隻唐老鴨（DonaldDuck）同佢個名襯到絕，特登拎住把唐老鴨同米奇老鼠雨遮，以竹篙灣地盤做背景，影番張相留念。
今個月有大盤開賣，市場氣氛好轉，美聯沙田、馬鞍山同大埔區營業董事鄧天勇話，佢哋今個月頭十日嘅營業額近四百萬，已經比上月同期升咗近七成。當中大埔龍成堡係主要收入來源，呢個盤由今個月一號開賣到噚日，總共賣出咗五十二個單位。
佢指出，大埔新達廣場分行做咗八單，而大圍富嘉花園、馬鞍山海栢同馬鞍山中心分行，各做到三單，呢四間分行加埋已經佔咗十七單，等於賣出單位總數嘅三成三。可見屋苑潛在購買力好大。
早前話有準買家想買十幾個單位，聽講價錢未傾掂，所以重未成事。
大業主商場近排不斷提供優惠，吸引消費者，成績係點呢？睇吓太古鰂魚涌太古城中心商場或者有答案都未定。
太古發言人話，佢哋喺五月十六號推出美食同娛樂獎賞，到咗噚日，一萬六千個名額已經額滿。計番平均每日最少有六百幾人幫襯；而以每人消費額最少八百蚊至換到禮品計，即係為商戶帶嚟至少一千二百八十萬蚊生意。其他商場大業主又點睇呢？
今個禮拜日係父親節，又係樓盤促銷的黃金檔期，桂洪地產北角和富豪庭，推出「9999黃金父親節獻禮」，聽落好似同送黃金有關，但實情係當日推出嘅四個單位，全部都喺九樓。
既然係促銷，自然會有優惠。中原地產北角城市花園區域經理鄭莉莉話，發展商之前搞個送金屋同回報優惠，計落呎價二千九百五十蚊，今次平均二千七百一十二蚊，平咗成八個巴仙。
鄭莉莉指出，今次希望可以吸引到置貸客同外區客入市。
蘭西
電郵地址：
