香港樓盤時興請置業大使協助宣傳，原來呢股風氣已經吹到深圳。百仕達控股屬下紅樹西岸地產，近排同中國新絲路模特兒經紀有限公司簽合作協議，開拓時尚新穎嘅地產推廣模式。
呢項合作係透過新絲路喺內地挑選高質素大學生，培養成為全能銷售優才，除咗要精通百仕達嘅賣點，重要有良好生活品味，又要向客戶提供家居生活用品嘅意見，同埋市場訊息。總之就係樣樣都要識。唔知佢哋係咪要具備埋模特兒嘅條件呢？
百仕達行政總裁鄧銳民話，呢次合作，可以為百仕達花園第四期「山水城」、紅樹西岸同大梅沙嘅湖心島項目銷售工作打好基礎。日後百仕達有盤開賣，記得留意吓呢批新秀嘞。
呢次簽約除請來知名人士出席，重即場搞咗次籃球友誼賽。
嘉里建設嘅大埔滌濤山，四月份搞咗個「私人花園大師賽」，經由三個專家所組成嘅評審團、記者團同埋參觀人士投票之後，終於有結果，冠軍係77號屋嘅花園，由園藝廊設計。
呢個花園攞獎嘅原因係設計概念「悠悠自得」，以水池、流水同噴泉做主題，再配合時花同動植物雕塑造型，如懶洋洋嘅青蛙、池邊作樂嘅天鵝等，營造輕鬆歡樂嘅家居氣氛。
嘉里物業執行董事朱葉培，親自頒咗個獎盃畀園藝廊董事羅浩翔。
非典型肺炎疫症預期就快過去，市民大眾嘅防炎意識都弱咗。新地早排請嘅五百個抗炎大使，冇因為咁而失業，只不過變身做咗「健康大使」。
新地發言人話，呢班「健康大使」會繼續喺旗下商場同寫字樓，執行清潔工作，重會向遊人宣傳清潔運動訊息，勸喻遊人唔好隨地吐痰、亂拋垃圾同喺公眾地方食煙等。
發言人重話，會繼續有衞生站，向有需要人士提供口罩、探熱同消毒等服務。
長實東涌映灣園二期宣傳工作終於開始，頭炮會搞慈善活動，幫公益金籌款。噚日嘅宣傳活動特別由日本請嚟HelloKitty亮相，今個禮拜六、日，將會喺中環遮打花園舉行「映灣園HelloKitty慈善嘉年華」，到時會有曬到一身古銅色嘅HelloKitty以比堅尼泳裝登場。慈善入場券𠵱家喺中環已經有得賣。
張入場券重有兩項抽獎，包括擦擦卡同抽獎券，首先只要擦中兩項相同嘅映灣園會所設施就可得獎。至於抽獎，大獎就係三十萬簽帳額。做善事又可以做埋宣傳，一舉兩得，長實透露，𠵱家已經賣出咗五萬張門券。
金管局早前公布，四月份破產個案有二千七百一十宗，而申請破產個案就有二千一百六十宗，比三月少咗，當然係好消息。
不過，蘭西收到中原測量師行最新刊物，佢哋有唔同睇法。
佢哋話，四月假期多，扣除呢個因素，申請破產嘅數目實際係升咗，比三月大約每日多一宗。
刊物又引述銀行界講，因非典嘅負面影響重未浮現，預期全年破產數字會比舊年多。
蘭西
電郵地址：
