基金I近半年經常到大陸活動，搵投資項目，無懼沙士橫行。呢日，佢失驚無神在陸羽出現，大家都有啲愕然。基金I年青時有啲左傾，入內地做生意見得貪污腐敗多，變成反共派，呢幾年睇到化，覺得內地經濟飛躍進展，香港回歸後六年，冇樣掂，基金I成為頭號反港愛國派，中國乜都好！
食完叉燒包，基金I就話：「中國朝氣蓬勃，學生好叻。」莫講清華學生，廣州中山大學學生都叻過港大一皮。香港冇咯，你哋重掛住香港，必遭淘汰。我呢幾年喺北京、上海、廣州見過無數叻人，返嚟香港就見盡蠢蛋治港，你哋死梗，第日要靠內地扶貧。」
扶貧？侮辱啲喎。基金I大發陰謀論：「香港人越反董，中央越挺董，直情係想用阿董搞到香港民不聊生，香港人除咗去中央哭訴，就冇晒辦法。到時中央大搖大擺咁落嚟扶貧，你哋班人重有聲出？重敢反對二十三條！」
基金I啲陰謀論，冇乜邏輯，但以佢嘅接觸面、經驗，以及中港兩地嘅人際關係，都有咁嘅想法，實際反映咗財經界對董先生及佢啲手下，極度不滿。不過畢竟與內地來往得多，基金I話：「嗱，你千祈咪爆我個名出嚟，我重要同啲高官見面握手㗎！」中國人就係怕公開反對當權派，背後猛鬧，對着個咪就會挺董，基金I亦無例外。