前一排，連續睇咗兩個棟篤笑表演，兩個都同樣地有好多政治笑話。子華福大命大，趕及在沙士暴潮爆發前完成所有場次，觀眾雖然都戴住口罩嚟笑，但重笑得出，重笑得好大聲㖭。另一位是話劇界的占基利——詹瑞文，詹的棟篤笑也是大量政治笑話放送，詹扮演諸位高官，扮一個觀眾笑一個，全部冇失拖。
香港不知是走運還是不走運，由領導人至各高官，各有各好笑。人物造型與服裝指導俱是一絕，各有各美妙風格，誰也搶不了誰鋒頭。唯獨是曾氏兄弟有點突兀，經常黑口黑面，但這種爆笑劇也的確需要些黑面神襯托，顯出不協調的荒謬感。的確是搞棟篤笑表演的好機會，着數的地方是唔使點度橋，基本上照搬各位高手的一言一行，經已笑爆口。特區領導人兩公婆實在算唔話得，接力演出，前仆後繼，叠瓦式助攻，你以為老公好笑，點知老婆再嚟一個索位，此起彼落。
本來係成萬人在機場跑道砌個心形圖案出嚟，但在風雷雨電中，被迫退回室內，第一夫人驚大家冇癮，於是又施渾身解數，得出金句：「愛愛愛，笑笑笑，唔……（𠵱起個口教大家點笑）飛飛飛。」呢啲金句真係連李白杜甫翻生聽到都再激死。講完金句，老公再將大支票頒畀老婆，二人跟住擁抱，心中的潛台詞是我哋兩公婆咁為香港都算係咁嘞啩?!
幾百萬市民望住個電視機真係唔知笑唔笑得出。