自幼喪父的佘詩曼遺傳了父親的臭脾氣，所以小時候的花名叫「臭屁」。阿佘又是為食貓，曾為偷吃朱古力擔櫈仔爬高，但想不到她長大後既不貪吃，脾氣亦收斂，更被冠以「嗲精」花名。
佘詩曼三歲的時候，父親就過身，母親兼父職，一手一腳湊大三名子女。阿佘有一兄一弟，所以她是家裏的掌上明珠，而且她遺傳了父親的臭脾氣，童年時確實是野蠻妹，更有「臭屁」這個花名。
阿佘日前在尖沙嘴接受訪問時說：「我細個花名叫『臭屁』，因為臭脾氣，爹哋都係臭脾氣㗎。我記得有次爹哋喺屋企睇緊電視書，我同佢講嘢，佢唔理我，我就一手拍跌佢本書，嫲嫲叫我執番，我係都唔肯執。不過，長大後我反而冇乜脾氣，可能爹哋早過身，學唔到佢啲嘢，只學到媽咪脾氣好嘅一面。」
身輕如燕的阿佘原來小時候十分貪吃，可說是無朱古力不歡。阿佘想起當年偷吃朱古力被母親打，不禁失笑說：「我細個好肥、好為食，好鍾意食朱古力，食朱古力都食飽，唔使食飯。」
阿佘續說：「有次阿媽將啲朱古力放喺雪櫃頂，但係我擔櫈仔，櫈叠櫈爬高攞，結果將雪櫃入面啲嘢全部掹晒落地，跟住俾人打啦。阿媽攞籐條打咗我手板一下，之後我唔睬佢，可能嗰時爹哋啱啱過身，媽咪心情唔好，嗰次之後，佢都冇再打過我。」
阿佘一家人長年各分東西，母親居於美國，她在香港念中學時，兄長在意大利讀書，弟弟九歲時又到加拿大留學，而阿佘在中六那年就往瑞士升學，她說：「我哋成家人好難坐埋一齊食飯，𠵱家阿哥同阿嫂喺香港，媽咪同細佬重喺美國住，所以每次見面大家都好珍惜，唔會嗌交，大家都好好感情㗎。」
採訪：朱芷瑩
