假後大市低開高收，大部份時間在窄幅內拉鋸，行情雖企於近期高位，但並無太大沽壓，短期大市似有再升一轉始肯調整之勢。恒指收9733，升38點，成交76億元，期指收9745，下跌12點，高水收窄到只有12點。
噚日提過嘅基金股，震雄（057）同權智（601）彈出，前者收2.8元，升6.6%，後者收0.38元，升7%。權智已突破複式頭肩底頸線形態，並完成後抽整固，短期可向0.42元的上升目標進發。浙江玻璃（739）一度升上1.35元後收1.32元，仍有3仙進帳，走勢就似做緊三角形整固，可留意。中意控股（1198）表現最差，跌5.4%。
同芬佬食晏，又收到料，佢話唔少外國基金，特別係退休基金，都一直有增持港股，持貨量已相當可觀，街外嘅貨源（主要講藍籌股），幾乎畀佢哋「擸」晒，散戶手中真係冇幾多貨，除非再有天災人禍，否則港股幾難唔升。
基金同大行入市，估計平均水平在9000點，冇20%至30%利潤，佢哋唔會收割，照計恒指今年真係有好大機會升上萬一點水平。
講到後市嘅領導股，除滙豐（005）同中移動（941）外，基金對李系亦好有興趣，長實（001）同和黃（013）必然有份唔在講，最特別嘅係佢哋收集隻和記港陸（715）亦好落力，難怪呢輪走勢咁強。
港陸往績PE（02年度12月止）38倍，03年同04年度嘅盈利，起碼要以倍計增長，PE先會落番去吸引水平，好明顯，基金𠵱家上車，絕對係睇好公司嘅前景。港陸有冇發圍嘅條件，應該有，否則大股東和黃亦唔會斥資4億元增持股權至58%。
集團主要生產玩具和高增值科技產品，今年玩具接單情況比去年為佳，冇受非典型肺炎疫症影響，而科技業務在和黃栽培下，亦有顯著進展，目前主要製造手提電話配件和手機的數碼相機，日後並會供應和黃3G電話的配件，估計今年定單總值不少於2億元。
港陸近期升幅雖大，但走勢仍好強，噚日又再突破旗形整固嘅阻力，且有大成交支持，短期升勢可再現。過去10個月，港陸股價在0.45元至0.7元之間整固，今次破位，上升目標指向0.95元。
郭兆誠