Keyman講波多年，試過好幾次因不自覺地講到失聲，令他學識要控制及保護聲線，他說：「我把聲本身幾沉，所以初時參與學講波時要提高啲聲調，使到球迷及觀眾聽得清楚啲，而自己初期並唔會特別點樣用啲乜嘢方法去保護自己把聲。
但後來試過幾次做現場節目，因為現場環境好嘈，喺不自覺嘅情況下大聲咗，結果搞到把聲拆晒，咁對講波嚟講都算幾大件事，吸取過呢啲經驗同教訓後，𠵱家識得就算現場環境係點，都要控制自己用同一『度數』講波。」
「有時遇着大賽時，會有可能連續講五、六個鐘頭，咁長時間不停咁講波，把聲沙啞在所難免，所以要識得留力，唔好去到咁盡，因為分分鐘把聲拆咗都唔知，到時就冇彎轉。」
他說，近幾年除了會飲些花旗參蜜，以求令到把聲保持較佳狀態外，最重要還是多休息，「這行生活比一般人顛倒，所以休息最為緊要，有時要通宵做節目中間有少少時間都會瞓一瞓。」他說。
跑步：每星期2次，每次30分鐘
踢波：每星期1次，每次1小時30分鐘
游水：每星期4次，每次30分鐘
運動小貼士：「其實城市人做運動主要保持健康及身手，並唔係同人鬥快或者鬥技術，所以唔需要太搏及做得太過激烈，最緊要令到自己保持對運動嘅興趣，咁就自然可以經常去做，持之以恒就可以將運動變成生活一部份。」
早餐：薯餅、麵
午餐：咖喱牛肉或牛腩飯
下午茶：西多士、麵
晚餐：住家飯，飯、菜、魚、水果
飲食小貼士 ：「最緊要食早餐，因為食咗先有能量同體力應付全日工作。」