港股噚日果然跌唔落，尾市嘜高滙豐（005）1個價，恒指就以貼近全日高位9733收市，但只係微升38點。
恒指噚日走勢相信散戶唔會陌生，呢招係對抗外圍美股偏軟或其他利淡消息嘅招數，已經重複用過好多次。港股微升二三十點，往往係恒指Call輪冇得升，但Put輪就跌到足，目前唔係入市揸恒指輪嘅時候，但就不妨昅實一對數據較合理的恒指Put輪及Call輪，一旦大市出現突破性走勢，可以即時作出反應，正如上周四及上周五，半日波動市已經夠水位炒日鮮。目前恒指Call輪首選仍係9723，Put輪則係9715。
其實策略好簡單，睇到恒指明顯向上或向下，即市追入恒指Put輪或Call輪，如果到尾走勢冇變，先沽一半獲利，另一半揸過夜；如果一段時間後走勢改變，就即刻計數離場。建議以上策略，係希望好彩捉到轉角市，對於不貼市及不熟悉窩輪玩法嘅散戶，當然唔適合。
倉內偉易達（303）微升1個價，收5.60元。短期關鍵係10日線重新升穿20日線帶來上升動力，挑戰5月頂部5.85元。另外，海域（1220）噚日反彈逾3%，重回50日線（現處1.30元）之上收市，短期不宜再跌穿近期低位1.24元，最好是守穩1.30元之上整固一段時間，待技術指標轉好後，有望重展升浪。短期若見企穩在1.30元附近，可先買入1注，待正式轉勢後再加注，短炒止蝕位1.25元。
趙飛雲