女子組合MiniCookies成員Kary噚日十七歲正日生日，佢前晚同班朋友喺銅鑼灣一間卡拉OK開生日會，MiniCookies兩位成員Theresa同Stephy、Cookies前成員Angela同Gloria、EO2嘅Otto同Osman、Shine嘅徐天佑同余文樂等都一齊嚟賀「壽星女」。
MiniCookies嘅Miki一直同天佑傳緋聞，但早前又有消息話因為Miki唔專一，搞到天佑好傷心，唱片公司喺噚日凌晨一點幾，只安排Kary、Theresa、Stephy同Angela落樓下畀記者影相，但唔知Miki係咪要避嫌，所以一直都冇見佢出現。
壽星女Kary透過唱片公司同事講生日願望，佢話希望事業同學業都兼顧得到，對於天佑同余文樂兩手空空嚟賀壽，Kary話大家志在玩得開心，一啲都冇所謂喎。
顧紀筠噚日喺將軍澳電視廣播城出席《智趣相投─我愛ICHI爸》開鏡拜神儀式。顧老闆着咗小背心，一時唔小心春光乍洩。喺年底就做新娘嘅佢，𠵱家煩緊減肥問題，佢話：「我由一百二十幾磅減到𠵱家一百一十幾磅，但重想減多六磅，因為有四套晚裝着唔到，我想結婚時體態fit啲嘛！」
何潤東𠵱家喺東京拍緊電影《假面騎士555》，佢趁住空檔嗰陣去咗新宿行街，點知行行吓居然有人拉佢去睇「偷窺劇場」，不過佢即刻好決絕咁同人講自己冇興趣，一口拒絕咗。由於拍攝嘅時間一啲都唔辛苦，所以何潤東成日都有時間可以周圍影相，佢有時重會到東京以外嘅地方取景。
鄭文雅噚日喺金鐘港麗搞咗個拍賣會，拍賣嘅陶藝作品係由鄭文雅嘅一班智障兒童學生所造，鄭文雅話：「呢個騷應該係一個月前搞，但係有SARS，所以被迫遲咗，知道香港疫情漸趨穩定好開心，於是就積極籌備，搞到我好唔得閒，連老公都問我搞乜，但我冇話畀佢知。」
羅蘭同埋一班演藝界前輩噚日出席喺港台舉行嘅《香江暖流－黃金歲月話當年》，喺活動上，一班前輩藉住話當年嚟勉勵大家鼓起勇氣面對逆境，羅蘭姐話六七年暴動當日，佢重喺街度拍外景，不過今次沙士就反而令佢推咗好多部要喺內地拍嘅戲，羅蘭姐話𠵱家年紀大，健康最重要。
吳展濠噚日去中環出席「映灣園HelloKitty慈善嘉年華」記者會，曾同李彩樺（阿Rain）合唱過嘅吳展濠，就話同阿Rain好friend，佢重話：「阿Rain都係我鍾意嘅類型，不過佢工作好忙，睇吓遲啲有冇機會發展啦！」
