憑《22世紀殺人網絡2決戰未來》嘅「大茄」角色而人氣再度上升嘅意大利索女莫妮卡貝露絲（MonicaBellucci），去年同法國影星老公雲遜卡素（VincentCassel）合演嘅話題電影《Irreversible》，早已有大班影迷同麻甩fans等住睇，我大口羅拉啱啱買咗套戲嘅英國版DVD，覺得套片係繼雲遜加路（VincentGallo）嘅《TroubleEveryDay》後，最令我覺得不安嘅電影！
好多影迷收到風，知道莫妮卡喺套戲入面有好大膽嘅演出，佢喺隧道入面俾個變態佬強暴嘅場面，真係好震撼，莫妮卡嘅慘叫亦相當悽厲，最令人慘不忍睹係佢重俾人拳打腳踢，最後毀埋容。而喺戲中做番莫妮卡老公嘅雲遜，露體程度比老婆仔去得更盡。
據知去年康城放映呢套片嗰陣，好多觀眾睇唔夠十分鐘就離場，原來開場令人頂唔順嘅地方，係雲遜去咗一間同志吧為妻報仇，鏡頭拍下好淫亂嘅打真軍場面。當雲遜同個大隻佬打起上嚟，重俾人拗斷埋隻手，好彩雲遜老友出手相救，用滅火筒「舂」到大隻同志個頭凹咗，嚇唔嚇死你？