近日忐忑不安，似有心事又像無，似想大解但解時又好像解無可解。實在不知如何是好，於是我嘗試跟着各大小電視廣告去生活。
廣告中，所有人都活得開心，所有事情都有好結果。
於是我不再揪着一個巨大的紅白藍袋搭電車了。哈，果然輕鬆得多。以前，上到車，哇，唔得，好肉酸，隻腳好乾！𠵱家用咁細嘅手袋，因為我再唔需要用大袋遮腳，淨係唔着阿伯短褲去街就得嘞，着番條長褲。
不過，唔知點解電車裏面，人人重係眼望望，係唔係妒忌我呢個細細個、但的確可以亂真嘅冒牌LV手袋呢？點解，我好似見到有啲乘客手指指，重叫我做「人妖」嘅？
少少苦楚等於激勵，管人家怎看怎說，我堅信依照廣告的指示去生活，例如不帶大袋遮腳，是會找到幸福的。
下了電車，來到麥當勞快餐店（別擔心，我不打算寫食經）。買了份陳慧琳賣廣告的那種ShakeShake粉和薯條，在店內模仿陳天后那樣，很不自然地搖頭擺腦shakeshakeshake，並力邀坐在附近的顧客也跟我一起搖搖搖，搖到外婆橋。隔枱戴粗金鏈的男人，好像不大喜歡搖到外婆橋做個好寶寶，更好像一點也不喜歡我。粗金鏈的眼神，甚有威嚴，令到我霍然踩brake，把所有搖擺動作煞停。
被驚嚇得臉色變了有點蒼白的我，跌跌撞撞搭電車回家，並且在車上睡着了，沒有「一個好人」靜悄悄為我梳理我那些凌亂和稀疏的頭髮，像某個廣告；我有點失望。
甫踏進家門，煮飯婆劈頭就問：「做乜面青青？」我學鄭秀文說：「哈，你梗係以為我做咗激光啦！」煮飯婆毫不友善回應：「好學唔學，學嗰塊洗衫板！今晚你冇飯食！」對於所有比她纖瘦的女人，煮飯婆都有成見。
虧我還以為，依照廣告去過日子，會有好日子過。