三支來屆英超聯升班隊伍，相信以樸茨茅夫最積極擴軍，但係可能受到球圈不景氣現象影響，都只向平價貨嘅過氣球員埋手，為咗搵最合適「老鬼」，領隊哈利列納實行將隊波變「老樸」。
哈利列納上季已經搵咗唔少自由身球員，包括麥臣、史東等英超過氣名將，結果換來英甲冠軍。不過，因為球會計劃興建新球場，大約只得五百萬鎊資金買人。哈利列納話一直都有去荷蘭、法國、德國同比利時等地方，希望搵到一啲自由身，佢同時亦吼實俾英超聯球會放棄嘅老鬼；上個禮拜簽咗捷克中場貝加就係一個最佳例子。今個星期，舒寧咸、美爾等都成為佢羅致目標。無錯，簽呢批球員的確慳番好多錢，但係我求大俠就懷疑佢哋捱唔捱到全季，真係一個大問題。
日本兩日前輸咗畀阿根廷一比四，即係薛高上任後，主場五戰未贏過。有球員話大敗，係因球隊太過想利用個人技術制敵，結果「缸瓦撼瓷器」。其實，薛高唔似得以前杜斯亞咁，側重整體戰。但禮拜三對巴拉圭如無意外會有高原直泰同中村俊輔復出，輸咗冇藉口嘞啩！
美國前晚友賽新西蘭主場險勝二比一，贏波輸盤，但係我求大俠睇住美國足總官方網站嘅即場報道，主隊全場攻勢多不勝數，有成二十幾次射門，而且有唔少球員都啱啱喺上個禮拜六踢完大聯盟，第二日又幫國家隊差唔多踢足全場，玩鐵人耐力賽，贏波都算有交代囉。
如無意外，楊晨下季會離開聖保利，最近傳出會投深圳健力寶，但呢位國足來季仍想圓德甲夢加盟科隆；但據聞科隆開出附加條件，想好似李鐵咁有贊助商支持，所以楊晨如果加盟健力寶，投身科隆反而重有機會，又做埋產品代言人，如果係真事，呢招都算高明囉！
尼日利亞禮拜三就會友賽巴西，日前喺非洲國家盃外圍賽對馬拉維省入兩粒嘅簡奴，就話好有信心會重現九六年阿特蘭大奧運會打敗巴西一幕，再次喚起全球球迷對尼日利亞足球關注，簡奴可謂唔放過任何表演機會。不過，我求大俠認為佢為自己多過國家隊，只係想藉對巴西，等阿仙奴領隊雲格唔踢佢走啫！
來季升上意甲嘅錫耶納，呢排猛搞升班派對，好可惜佢哋隊波兩個主將泰迪同埋比加，響上個禮拜六交通意外，泰迪嘅細佬已喪生。聽聞兩個球員已度過危險期，但傷成點就重要觀察。泰迪被意傳媒評為十大最佳新人，希望佢無大礙，否則對錫耶納影響好大。