「再見舊友感觸萬千，舊日笑聲似在眼前」這是曾路德小姐的名曲《那一天》，未聽過？介紹給您，很好聽，哪裏找？請放心，近日經典雜錦碟出到好似癲咗一樣，好快就隻隻碟都搵到。
言歸正傳，心血來潮約了小學中學同學食飯，大家多年未見，一碰頭便炒蝦拆蟹互相大大地問候一番。先傳來一個壞消息，一個同學因車禍在月前去世，大家舉杯shooter祝禱往生極樂。舊日天天相見，一起上課、一起出貓、一起坐車、一起撩女仔、一起吃飯、一起露營、一起睡，反而有很多問題不敢或是不好意思問，這些疑團困擾了我的前半生，這次抓緊機會問個明白，「究竟阿邊個係唔係黑社會？」「阿邊個唔係，佢老竇係。」「究竟你係咪識神打？」「我其實係扮識神打，自從俾啲陀地打咗一身話幫我『試童』之後，提都唔敢提。」「究竟中二嗰年你係咪已經同後山間女校個露絲初試雲雨情？」「關你鬼事！」同學仔這句答得最斬釘截鐵。
幾個小時飛快的過去，得到久違了的一些答案，牙骱笑得有點痠，心頭覺得很暖。記起已有很久沒見過同學仔的家人，曾有多少假期，睡在他們家的床上，吃他們家的豐盛晚餐。一定要買包橙、買罐曲奇餅到同學仔的家，好好地擁抱他們的家人，也擁抱自己的童年記憶。