黎明（Leon）、鄭伊健、吳鎮宇、林嘉欣、導演陳木勝同林小明夫婦等人，噚日去薄扶林數碼港出席電影《雙雄》嘅煞科派對。點知喺開完香檳之後，林太居然帶頭玩噴香檳，Leon、鎮宇同伊健就齊齊大反擊，最後林太同嘉欣就成為受害人。但係林太喺大合照嗰陣，又突然將香檳淋向伊健嘅下身，嚇咗佢一跳。
事後Leon話因為有好多開香檳嘅經驗，所以閃得快。對於有報道話佢拍戲時比伊健更加錫身，Leon話：「冇所謂啦，我係唔係錫身，咁多年點做嘢好多人都知，試問一個唔專業嘅演員點做演員呀？總之合理嘅嘢就要去做。」
吳鎮宇講到舊愛李婉華前日在溫哥華結婚，佢話已經好耐冇搵婉華，鎮宇話：「我細妹都住溫哥華，或者佢哋會聯絡啦。人哋話再見亦是朋友，我朋友都未必搵啦，我覺得佢肥啲靚啲囉！」
另外，有指楊受成捧鍾兆康都唔捧伊健，伊健話：「我理得佢捧邊個，《千機變》嘅宣傳我會照做。」
方力申近排轉換新形象，噚日佢出席港台喺理工大學舉行嘅活動時，話形象設計師規定佢每月要花過萬蚊買衫。方力申話：「屋企人傳統啲，最初都覺得唔係咁好，𠵱家我惟有儲少啲錢。我細佬着衫嘅尺碼同我差唔多，所以我添置咁多衫佢都可以着。」
葉文輝（啤梨）歌迷會噚日成立，大約三百名fans捧場。現場有一班印尼fans用廣東話同啤梨講：「我好愛好愛你呀！」𠱁到啤梨鬼死咁開心。啤梨話呢班fans喺夜晚聽佢個節目，所以佢哋打電話問啤梨可唔可以加入歌迷會。
陳曉東為咗劇集《倩女幽魂》，上個禮拜已經去咗北京灌錄主題曲，而今個月底就會去台灣做宣傳。由於台灣規定一般港客要隔離十日，東東初頭諗住去完泰國拍MV先再去台灣，好彩呢個規定已經放寬咗，東東到時只需要每日量體溫就得。
台灣女歌手徐懷鈺，前幾日俾人見到喺台北一間酒吧度，同個男仔好親熱咁跳舞，然後好風騷咁同個男仔嘴對嘴，真係浪漫。之後徐懷鈺又不時同個男仔四圍去，徐懷鈺話：「他叫Jon，我們是好朋友，他是我的健身教練。」
