在本港有40年經營歷史的諾曼第餐廳，一個月前因非典而暫時結業，近日卻「借殼還魂」，拉隊到昔日同一集團的麒麟啤餐廳再起爐灶，沿用所有舊「部屬」「再戰江湖」，實行以差不多「半價」嘅割喉式價錢推銷「原裝」法國菜，肯定是食客之福，千祈唔好錯過！
記者：何善華 攝影：林栢鈞
Model：Shelia&Martin(Imagine)
逢星期一至三、五刊出
David話，要食法國菜就一定要識飲酒，唔好以為紅酒一定係法國菜嘅附屬品，普通一杯白酒及啤酒背後都有其學問，不同菜式要配不同種類的酒。「但要食得咁講究，就要花唔少金錢，所以我調低價錢，令市民有機會學習食正宗法國菜，並且以年輕人為目標市場。
「以前喺『諾曼第餐廳』order一個套餐，閒閒哋每人都要300蚊以上，但𠵱家只需要100蚊左右，價錢的確好吸引：一杯紅酒或白酒都只係30蚊，趁後生開始學飲酒畢竟係最好嘅時候。」當然，現在餐廳有超過200多個座位，又位處尖沙嘴嘅中心地帶，自然會招攬唔少年輕人嘅幫襯。
炸得恰到好處的雞肉粒，皮脆肉鬆，包保是即叫即炸的餐前小食，再品嘗正宗嘅法國脆皮鴨，蘋果汁與脆皮鴨肉的香味配合得天衣無縫，零舍醒胃。
.David話餐廳有廚師專門「造腸」，連半島酒店都曾經買過他們的香腸，可見餐廳製腸功夫享譽飲食界，再以白酒品嘗龍脷柳，口感清爽，將魚類的腥味完全驅散，油而不膩。
以前在「諾曼第餐廳」賣$450一客，食客絕對不能錯過今次的良機。紅肉配紅酒是至佳的夢幻組合，半熟的羊肉令食客品嘗時可感受無比鮮味；羊鞍唔羶，再配上惹味嘅蒜蓉，滋味無窮。
用過頭盤及主菜後，必定要吃個甜品，才稱得上吃法國大餐。呢款菠蘿芭菲，甜甜酸酸得來又夠冰凍，而且色澤又豔麗，很配合夏天的感覺。
法國菜廚師特別炮製嘅南瓜慕絲，口感鬆軟煙韌，新鮮大蝦嘅味道濃郁無比，襯番杯白酒簡直是最佳配搭。
地址：尖沙嘴堪富利士道8號格蘭中心地庫
電話：23665968
營業時間：12:00nn-1:00am