劉德華昨日在旺角舉行新碟簽名會，吸引五千多人圍觀，場面墟冚，有歌迷更騎膊馬、企欄杆影相，可謂無所不用其極。華仔對fans有求必應，無論歌迷要求握手和擁抱，他都統統照做。
劉德華昨日為宣傳新碟，特別在旺角一唱片舖舉行簽名會，吸引近五千人圍觀，其中有二千五百人排隊索取簽名，有歌迷更於昨日凌晨三時在唱片舖門口打躉霸頭位。
華仔的歌迷層面非常廣泛，除老中青外，更不乏外傭，現場除了有二十多名保安維持秩序外，警察和民安隊亦有協助，華仔歌迷會更派了五十人支援，十分誇張。
就現場所見，大部份歌迷沒戴口罩，有歌迷為一睹偶像風采和影相，更騎膊馬、企欄杆。華仔對歌迷亦有求必應，無論簽名、握手，還是要求華仔「攬攬」，他都爽快答應。
華仔還特別準備一張櫈仔站高，使歌迷看得清清楚楚，華仔說：「其實我都好耐冇試過喺鬧市搞簽名會，原本我哋諗住只簽一千個名，但好多唱片舖偷步，搞到好早派晒啲籌，所以我哋先再加多千五個籌。本來我提議不如人盯人，咁秩序咪好囉，不過公司話我黐線。」
華仔坦言最怕場面失控，他說：「好似我喺台灣都試過搞簽名會，整跌晒啲欄，如果搞到咁，我又覺得唔係咁開心。」問華仔站在櫈仔，會否怕像霆鋒般跌倒？他說：「我叫咗公司啲人幫我檢查，應該好穩陣，最緊要事前工夫準備得好。」
採訪：胡比
攝影：仇志德
