近排，德國福士新車一浪緊接一浪，曝光率可算係一眾歐洲車之冠，但原來福士嘅品牌唔止深入民心，近期重大舉進佔咗警方嘅車隊㖭！皆因早兩日，亞Mark同一位服務警界多年嘅「老差骨」傾開偈，佢話警隊一哥為咗打擊非法賽車活動，可謂不遺餘力，近期重有多批新警車，陸續交赴前線警務人員執勤用。當中，除咗早輪一批福士PassatVariant旅行車，被分派到新界各公路幹線作巡邏車外，原來福士代理最近重提供咗一批，外表跟民用Passat四門轎車無異嘅隱形戰車㖭！外觀上，呢部用作警方隱形戰車嘅Passat，一般駕車人士未必察覺出有異樣，事關佢只係響頭尾泵把兩旁，加有扁長藍白警用閃燈，當需要截停違例車輛時，車廂後排頂才會伸出Police、Stop嘅字樣；惟骨子裏佢卻用上一台2.8公升V6偈，馬力有193匹之餘，佢重輔有恒式四驅4Motion系統同5前速手波，其中0至100公里加速度亦不過係8.0秒，相信一班飆車族，真係要收斂吓喇！