保安局局長葉劉淑儀平時嘅打扮突出，尤其佢個「掃把頭」髮型更加係「生招牌」，噚日佢應民建聯嘅邀請去沙頭角、吉澳同荔枝窩生態遊，一樣令人眼前一亮。
噚日早上天氣都唔錯，葉局長着住件長袖白色上衣，同埋一頂有「飛龍」標誌嘅帽，驚俾個太陽晒親。咦！局長竟然拆招牌改咗髮型？
原來八方睇錯啫，局長只不過將頭髮束咗個小馬尾，又將兩旁啲頭髮夾起，睇起嚟成個樣就唔同咗。
大家擾攘一會，就上船出發去荔枝窩。船上有人同局長傾偈，話有次唔小心上咗伶仃島，唔小心做咗「非法」入境者，點知熟知非法活動嘅局長卻諗埋一邊，無厘頭講句：「咁有冇人叫你飛髮呀？」
局長去到荔枝窩嗰陣，個天突然落大雨，當大家狼狽避雨之際，局長又再變身，施施然咁戴上一個透明綑黑邊嘅膠雨帽，有如「摩登村姑」，佢重笑笑口話：「我喺街市買㗎。」之後局長全程落幾大雨都唔使擔遮，呢款設計咁方便，可能成為婦女界新潮流喎。
經過行足幾個鐘嘅生態遊後，八方開始佩服葉局長，因為佢全程着住兩吋高涼鞋，都冇話辛苦，的確唔講得笑！
（圖）噚日落大雨，葉局長施施然戴頂雨帽，雖然有啲似村姑，但就唔使擔遮咁麻煩。
張家俊攝
傳真︰2623-9278
電郵︰