上個星期飲茶嘅時候，太子L拎住本《快週刊》（唔記得邊一期）一個笑話畀餐廳L睇。呢個笑話來自大陸某地KFC（肯得基炸雞）嘅廣告，英文就係Wedochickenright中文就好似係「我們做雞對了。」餐廳羅笑到碌地。前幾日見《信報》專欄（毛尖）亦講呢句廣告，研究中譯，認為「我們做雞是正點」最為適合。
中國各地方言甚多，呢一句「我們做雞……」喺香港絕對唔掂，英文嘅意思係「我哋烹調雞隻嘅方法最啱、最好」。如果左丁山譯為香港流行口語，就係「我哋炸雞最正」（KFC現在係唔係只賣炸雞，左丁山唔知道，有幾年冇幫襯過咯），不過無論如何，呢句英文甚為難譯。唔知讀者有冇高見呢。
我哋做雞唔正，做股民就俾人劏。好似中銀香港咁，究竟劉金寶發生乜嘢事，全無交代，金管局、證監會、交易所噤若寒蟬，完全唔敢出聲。李國寶最有吉士，問金管局點解以特快速度批准和廣北做中銀香港總裁，真係問得好。記得有一間外資銀行請阿頭，金管局追問個人歷史，喋喋不休，呢次點解大放綠燈呀？
太子L就話劉金寶肯定冇事，有免死金牌，佢拎出一張中國銀行嘅一百蚊紅衫魚，上面有劉金寶嘅簽字，太子L話：「從來喺港元上簽過名嘅人都唔會有事嘅！」諗諗吓，太子L或者有道理，中國點都要畀面香港銀紙嘅！