繼世界衞生組織之後，美國疾病控制及預防中心上個禮拜亦都宣布解除對香港嘅旅遊警告，呢個消息，對於全香港市民嚟講，真係可喜可賀。「沙士」疫情轉趨穩定，大家嘅焦點都開始放喺點樣搞番好香港嘅經濟。
近排政府各個高官頻頻「做騷」，鼓勵香港市民消費，同心振興本土經濟。愛心大使喺呢方面就最支持政府。但喺大使接觸嘅個案中，真係有好多家庭連食都唔夠食，莫講話買乜買物。大使就最同情嗰啲冇經濟能力，晚年要靠綜援金生活嘅老人家，唔少公公婆婆重眼濕濕咁同大使呻，佢哋話生活真係好困難，最慘社署重要由今個月起分階段削減綜援金百分之十一，簡直係攞佢哋條老命。
政府嘅政策大使冇能力去改變，唯一可以做嘅，就係努力搵多啲資源，去幫助呢班可憐嘅老人家。好似最近，大使就聯絡上信興教育及慈善基金，佢哋好慷慨，答應捐出總值約十萬元嘅全新家居電器畀蘋果日報慈善基金，轉贈畀有需要嘅長者。
信興教育及慈善基金今次已經係第三年捐電器畀蘋果基金，今次捐出嘅電器包括有電視機、雪櫃、洗衣機、電熱水煲、電飯煲同收音機，大使將會喺短期內陸續安排送出。讀者亦可以響應呢個行動，捐出新嘅電器；機構同工知道有弱勢家庭有咁嘅需要，亦可以轉介比我哋幫手。
暖流熱線
電話：29908688
傳真：23702192
電郵：
網址：